blanko...

^I
 ang lapis at papel ay huwag mong titigan
 hindi yan gagalaw ng mag-isa kaibigan
 isulat mo ang iyong pagal na isipan
 at huwag kimkimin ang piit na karamdaman..

^II
 'pagkat walang sakit na kayang tiisin
 lalo na't mag-isa mo itong sasaluhin
 gaano man kapayapa ang ihip ng hangin
 ay hindi maitatago ang simoy ng landasin..

^III
 ilang beses man ulitin ang pait ng hangarin
 sa labing sarado at tuyong bigkasin
 mga letrang binuhol tinik mong lunukin
 dahil kusang babalik ang awit at dalangin..

^IV
 isigaw mo man ang iyong katahimikan
 walang makakarinig sa bulong na iyong iiwan
 ang tuyong mga luha ay iyong punasan
 mga patak at daing ng mutang pinag-ipunan..

^V
 ipayapa ang tibok at pintig sa dibdib
 katotohanan mang pilit ay iyong daigdig
 sinakluban man ng langit ang pusang talahib
 hintaying liwanag sa piling ng kuliglig..

^VI
 ang pagod na isipan sa antok na lumisan
 ay naglahong panaginip sa dilim ng bakuran
 akyating bakod sana ay iyong iwasan
 pikit na bangungot hinayaang ipagtulakan..

^VII
 huwag mong lunurin ang iyong pagka-uhaw
 sa basong mainit at yelong tinunaw
 ang tsokolateng inamag, dinurog at naagaw
 kainin mang pilit parang panis na bahaw..

^VIII
 sa init ng araw na may kalamigan
 at buwan na liwanag na may kabilugan
 alaalang magtatanim sa iyong isipan
 lalo na't nalalapit itong pistang bayan..

^IX
 ang garapatang pilit mong sinulsihan
 telang binalot para sa kanyang kasiyahan
 at gaano man kahigpit ang taling bigkisan
 mumunting sisidlan ng iyong huling paalam..

^X
 'pagkat makulay mong bulaklak na muntian
 may ngiting nagsasambit ng tuwa't kagalakan
 gustuhin mang ibig kahit kaibigan
 ang pasong silayin ay nasa ibang bakuran..

^XI
 kaya't iwasang malungkot sa limot ng kahapon
 at malumbay sa duyan ng pag-asang nabaon
 durog na pusong pira-pirasong tinapon
 maling simulain sa tamang pagkakataon..

^XII
 iyong iwasto ang lahat, gamutin iyang sugat
 umiwas mang pilit kalungkutang hinagap
 tulalang pagtitig sa blankong sinulat
 tinaboy ng hangin, payong kong alapaap...

   _{—cæle, v.11092014}